PLATITO
Adonis Durado
Nanghugas kog tasa
ug platito
dihang kalit kong
nahigugma
sa pulong nga
"platito"
Platito-pla-ti-to
inig litok
mokang-a ang imong
baba
ug labtikan sa
imong dila
ang ngilit sa imong
ngipon,
dayog tutho sa
simod-pla-ti-to.
Tingali kung ang
akong asawa,
napangalan nako nig
"Platito".
"Intawn ang
akong Platito."
"Sus,
gakamuritsing si Platito."
"Kaparaygon ba
aning Platito"
Para nako, kung ang
"platito"
usa pa ka kolor,
siguro mora
kinig kolor sa
puwang sibuyas--
ang kapuwanon dili
puwa.
Kung ugaling usa ni
ka numero,
morag gahinambid
nga kwatro
tupad sa mabdos nga
otso.
Kung parte kini sa
nawong,
mao niy bukobuko sa
dungan
o kaha kanal nga
mibadlis
taliwa sa ilong ug
sa ngabil.
Kung usa kini ka
mananap,
usa ka isdang
barungoy--
di lang kahibawng
molangoy,
kaantigo pud nga
molupad.
Kung tiyempo kini
sa panahon,
basin uwan sa
udtong tutok
o ang unang tugnaw
sa tun-og
sa kagabhion sa
Nobyembre.
Kung usa kini ka
instrumento,
turutot ni Louis
Armstrong
"Turutot"
--haha, gwapoha ba
yati aning
pulonga--tu-ru-tot.
"Turutot,
turutot sa turutoy..."
Ug kalit lang, wa
ko kamatikod
nahiplos na diay sa
akong kamot
ang gisabunan kong
platito.
Meet the Writer
Adonis
Durado
works as a graphic designer and is currently based in Bangkok, Thailand. He
received the "Emmanuel Lacaba Prize" from the National Commission for
Culture and the Arts in 2000, and "The Best New Writer" from Cebuano
Studies Center and Faigao Foundation in 2001. He was a fellow of Iligan
National Writers Workshop, UP National Writers Workshop, and Don Cornelio
Faigao Workshop. (http://balakerongdaku.blogspot.com/)
0 comments